Azərbaycan, Bakı, 7 iyun /Trend, müxbir H.Vəliyev/
Nokia şirkətinin "Ovi" servislərinin Azərbaycan dilinə lokallaşdırılması üzrə işlər sentyabrda başa çatacaq. Bu barədə Trend-ə çərşənbə axşamı Mobitel (Nokia-nın Azərbaycandakı rəsmi distribüteri) şirkətinin brend-meneceri Rəşad Nəzərli deyib.
Nəzərlinin sözlərinə görə, söhbət iki məhsulun ("OviStore" və "OviMaps") lokallaşdırılmasından gedir. Onlar yaxın gələcəkdə rebrendiqdən sonra müvafiq olaraq "NokiaStore" və "NokiaMaps" adlandırılacaqlar.
Azərbaycanda servis işə salındıqdan sonra "onlayn-mağaza"nın istifadəçilərinə "Ovi Store"a qoşulduqları zaman avtomatik lokollaşdırılmış versiya təqdim ediləcək.
"Ovi Store"un oyunlar, audio və videofaylların "onlayn-əlavələr" mağazası Nokia mobil telefonları üçün xüsusi olaraq hazırlanıb.
Azərbaycan bazarında bir neçə dəqiqə ərzində saytın və ya bloqun RSS axınını əlavəyə çevirməyə və onu "Ovi" mağazasında yerləşdirməyə imkan verən "Ovi App Wizard"ın lokallaşdırılmış versiyasının təqdim olunması da planlaşdırılır.
