Azərbaycan, Bakı, 16 iyun /Trend, müxbir H.Vəliyev/
"Alma Store" ("Apple Premium Reseller" firma mağazalarının Azərbaycandakı rəsmi şəbəkəsi) mağazalar şəbəkəsi "Trade-in" aksiyasını həyata keçirməyə başlayır. Bu barədə cümə axşamı Trend-ə şirkətin baş icraçı direktoru Ramin Musayev deyib.
Musayevin sözlərinə görə, iyunun 17-də başlayacaq aksiya masaüstü "iMac" kompüterlərinin və "MacBook" portativ kompüterlərinin istifadəçiləri üçün planlaşdırılıb və köhnəlmiş modellərin yeniləri ilə əvəzlənməsini nəzərdə tutur.
"Aksiya çərçivəsində 2005-2008-ci illərdə satılan kompüterlər qəbul ediləcək. Yeni modellər üçün qiymətlər bizim internet resursumuzda yer alacaq. "Trade-in" aksiyasında iştirak etmək istəyənlər əlavə ödəniş edərək kompüter ala bilərlər. Köhnəlmiş kompüterlər həm texniki vəziyyətinə, həm də xarici görünüşünə görə qiymətləndiriləcək. Güman edirəm ki, aksiya qurğularını təzələmək istəyən müştərilərimiz üçün maraqlı olacaq", - Musayev qeyd edib.
"Trade-in" aksiyası "Alma Store" mağazalar şəbəkəsində bir ay ərzində qüvvədə olacaq. Aksiyanın müddəti onun populyar olmasından asılı olaraq uzadıla bilər.
Köhnə kompüterlər aksiya başa çatdıqdan sonra təkrar satışa daxil olacaq. Musayevin sözlərinə görə, onlar korpus və lazım olduqda batareyalarına kimi diqqətlə diaqnostikadan və servis xidmətindən keçəcək.
"Bu qurğular təkrar satışa tam işləyən qurğular kimi daxil olacaq. Alıcılar onlardan əvvəlki sahiblərinin istifadə etdiyi müddətə kimi istifadə edə biləcəklər. Köhnələn kompüterləri təkrar satmaqla əlbəttə ki, əlavə mənfəət əldə etmək məqsədi güdmürük. Əsas məqsəd yenisini almaq imkanı olmayanlara kompüter almaq imkanı verməkdir. Onlar bu kompüterləri yarıqiymətə ala bilərlər", - Musayev qeyd edib.
