...

Azərbaycanda "Elektron hökumət"in informasiya sisteminə qoşulan dövlət idarələrinin sayı 8-ə çatacaq

Telekommunikasiya Materials 2 Avqust 2011 17:56 (UTC +04:00)

Azərbaycan, Bakı, 2 avqust /Trend, müxbir H.Vəliyev/

Azərbaycanın Təhsil və Səhiyyə nazirlikləri "Elektron hökumət" dövlət informasiya sisteminə qoşulacaq. Bu barədə çərşənbə axşamı Trend-ə Rabitə və İnformasiya Texnologiyaları Nazirliyindən deyiblər.

Dövlət müəssisələri arasında informasiya mübadiləsi üçün artıq "Elektron hökumət" informasiya sisteminin fəaliyyətinin həyata keçirilməsinə başlanıb.

Nazirliyin indiyədək olan məlumatına görə, sistemə (baş server Rabitə Nazirliyində yerləşir) nazirliyin özündən başqa, Ədliyyə, Vergilər nazirlikləri, Dövlət Gömrük Komitəsi, DSMF, Əmək və Əhalinin Sosial Müdafiəsi Nazirliyi qoşulub. Bu dövlət müəssisələrində serverlər və informasiya təhlükəsizliyi sistemləri quraşdırılıb, servislərin və onların sistemdə informasiya məlumatlarının əalqələndirilməsi üzrə işlər aparılır. Bundan başqa, "Elektron hökumət"in informasiya sisteminin bazası əsasında ödənişli xidmətlərdən istifadənin təmini üzrə işlərə də başlanılıb.

Dövlət idarələri tərəfindən göstərilən bütün elektron xidmətlər, eləcə də yaranacaq yeni xidmətlər "Elektron hökumət"in vahid portalına köçürüləcək. Onun yaradılması üzərində iş başa çatmaq üzrədir.

Portal nazirliklərin bir-biri ilə elektron şəkildə fəaliyyət göstərməsi sayəsində vətəndaşlardan tələb olunan sənədlərin sayının azaldılmasına yönəlib.

"Elektron hökumət" portalının yaradılmasında mövcud informasiya bazalarını və müxtəlif platformalarda yaradılan sistemləri birləşdirəcək X-Road sisteminin prinsipindən istifadə olunacaq. X-Road sistemi müxtəlif dövlət təşkilatlarının məlumat bazalarını birləşdirməyə, əhaliyə kompozit xidmətlər göstərməyə, eləcə də "dövlət-vətəndaş" dialoqunun aparılması imkanı ilə interaktiv servisləri təqdim etməyə imkan verəcək.

Xəbər lenti

Xəbər lenti