Azərbaycan, Bakı, 20 avqust /Trend, müxbir H.Vəliyev/
Azərbaycanın poçt rabitəsi operatoru "Azərpoçt" MMC öz şəbəkəsində oktyabrın əvvəlindən başlayaraq "Zolotaya Korona" və "Contact" ani pul köçürmələrinin xidmətlərini tətbiq etməyi planlaşdırır. Bu barədə Trend-ə Azərbaycanın Rabitə və İnformasiya Texnologiyaları Nazirliyinin poçt rabitəsi şöbəsinin müdiri, Regional Rabitə Xidmətinin poçt rabitəsi komissiyasının sədri Novruz Məmmədov bildirib.
Məmmədovun sözlərinə görə, hazırda bu sistemlərin Azərbaycanın poçt operatorunun şəbəkəsində tətbiqi məsələləri ilə bağlı aparılan danışıqlar son mərhələdədir.
"Azərpoçt" MMC-nin planlarına "Coinstar" təcili pul köçürmələri sistemi xidmətlərinin tətbiqi də daxildir.
Hələlik operatorun şəbəkəsi yalnız "Western Union" sistemi üzrə təcili pul köçürmələri xidmətlərini təklif edir ki, ondan 200 rabitə şöbəsində istifadə etmək mümkündür.
