Azərbaycan, Bakı, 14 noyabr /Trend, müxbir H.Vəliyev/
"Aztrank" şirkəti CDMA standartında mobil rabitə xidmətlərinin göstərilməsi üzrə telekommunikasiya infrastrukturunun hazırlanmasına başlayıb. Bu barədə bazar ertəsi Trend-ə şirkətdən xəbər verilib.
Məlumata görə, şirkət yaxın vaxtlarda hazırlıq işlərinin başa çatdırılmasından sonra lisenziya almaq üçün Rabitə və İnformasiya Texnologiyaları Nazirliyinə müraciət etməyi planlaşdırır.
Həmçinin, yaxın vaxtlarda Çinin "Huawei Technologies" şirkəti ilə CDMA standartlı telefonların alınması üçün müqavilənin imzalanacağı gözlənilir.
Hazırda "Aztrank" AzEuroTel şirkətinin GPT (Böyük Britaniya) istehsalı olan stansiyası əsasında 437 indeksi altında CDMA stasionar simsiz rabitə xidmətləri göstərir.
Operatorun CDMA şəbəkəsi Bakı, Sumqayıt şəhərlərini və Abşeron yarımadasını əhatə edir. Şirkət perspektivdə regional səviyyədə də şəbəkənin əhatə dairəsini genişləndirməyi planlaşdırır.
