Azərbaycan, Bakı, 23 noyabr /Trend, müxbir H.Vəliyev/
Azərbaycanda "Elektron hökumət" portalının işə salınması gələn ilin martında gözlənilir. Bu barədə çərşənbə günü Trend-ə Rabitə və İnformasiya Texnologiyaları Nazirliyindəki mənbə məlumat verib.
Respublikadakı idarələrin göstərəcəyi elekton xidmətlərin ümumi sayının 300 olacağı gözlənilir.
Hazırda "Elektron hökumət" portalına 10 nazirlik və idarə qoşulub.
"Elektron hökumət" portalı vətəndaşlarla, dövlət və özəl sektorun müəssisələri ilə işi əlaqələndirən əsas alət olacaq.
"Elektron hökumət" portalının yaradılmasında mövcud informasiya bazalarını və müxtəlif platformalarda yaradılan sistemləri birləşdirəcək X-Road sisteminin prinsipindən istifadə olunacaq.
Portalın işə salınması vətəndaşlardan tələb edilən sənədlərin sayını azaltmağa imkan verəcək. Bu, müxtəlif idarələrin bir-biri ilə elektron formada qarşılıqlı fəaliyyət göstərməsi hesabına mümkün olacaq.
