Azərbaycan, Bakı, 12 mart /Trend, müxbir H.Vəliyev /
Transmilli Avrasiya superinformasiya magistralının tikintisi (TASIM) layihəsinin iştirakçıları məlumatların yayılmaması haqqında saziş imzalayıblar. Bu barədə bazar ertəsi Trend-ə TASIM layihəsi üzrə işçi qrupun rəhbəri İlyas Naibov-Əylisli məlumat verib.
Onun sözlərinə görə, sənəd martın əvvəlində Budapeştdə keçirilən TASIM layihəsi iştirakçılarının üçüncü görüşü çərçivəsində imzalanıb.
"Saziş layihə iştirakçıları arasında inam atmosferi yaradacaq, texnologiyalar, şəbəkələrin vəziyyəti haqqında məlumatları mübadilə etməyə imkan verəcək ki, bu da vacib addımdır. Qarşılıqlı Anlaşma Memorandumunun hazırlanması üzrə işlərin artıq aprelin sonunda Qazaxıstanda keçirilməsi planlaşdırılan işçi qrupun qarşıdaklı görüşündə başlanacağı gözlənilir", - Naibov-Əylisli deyib.
Onun sözlərinə görə, layihə üzrə konsorsiumun yaradılması CMA (contract maintenance agreement) sazişinin imzalanmasından sonra mümkün olacaq ki, bu da vacib məsələlərdən biridir və bununla əlaqədar işlər aparılır.
Layihəyə Rusiyanın "Rostelekom", Qazaxıstanın "Qazaxtelekom", Türkiyənin "TürkTelecom" və Çinin "ChinaTelecom" şirkətləri daxildir. Bütün operatorlar öz hökumətləri tərəfindən lazımi səviyyədə dəstəyə malikdirlər.
Budapeşt görüşündə TASIM layihəsində Azərbaycan tərəfdən operator qismində seçilən "Azertelekom" şirkəti ilk dəfə iştirak edib.