Azərbaycan, Bakı, 16 yanvar /Trend, müxbir H.Vəliyev/
Azərbaycanın Rabitə və İnformasiya Texnologiyaları Nazirliyinə Belarusun ölkədəki səfirliyindən azərbaycanlı sərmayəçilərin "Beltelekom" unitar elektrik rabitəsi müəssisəsinin təsərrüat hesabında olan "MTS" BMMC-in özəlləşdirilməsində iştirakı barədə təklif daxil olub. Bu barədə cümə axşamı Trend-ə nazirlikdən bildirilib.
Nazirliyin məlumatına görə, fevralın 6-da Minskdə keçiriləcək özəlləşdirmədə Belarusun aparıcı mobil operatorunun səhmlərinin 51 faizi bu ölkənin Dövlət Əmlak Komitəsinə keçiriləcək.
Nazirlikdən qeyd edildiyi kimi, səfirlik müsabiqədə iştirak etməkdə maraqlı olan Azərbaycan müəssisələrinə hərtərəfli yardım göstərməyə hazırdır.
Nazirlikdən bildirilib ki, "MTS" BMMC-in satış payının ilkin dəyəri 863 milyon dollar təşkil edir.
Belarusun mülkiyyətində və "Beltelekom" respublika unitar telekommunikasiya müəssisəsinin təsərrüfat hesabında olan "MTS" BMMC-in satışının həyata keçirilməsi üçün sərmayəçilərin seçim müsabiqəsinin keçirilməsi haqqında bildirişlə Belarusun Dövlət Əmlak Komitəsinin səhifəsində tanış olmaq mümkündür: gki.gov.by/about/press/news/c0ba3f6b96aaa4c2.html.