Azərbaycan, Bakı, 9 aprel /Trend, müxbir H.Vəliyev/
2014-cü ilin birinci rübündə Milli Sertifikat Xidmətləri Mərkəzi tərəfindən verilən elektron rəqəmsal imzaların ümumi sayı 3,4 faiz artaraq aprelin 1-nə 18 452 ədəd təşkil edib. Bu barədə çərşənbə günü Trend-ə Rabitə və Yüksək Texnologiyalar Nazirliyinin Məlumat Hesablama Mərkəzindən (MHM) deyiblər.
MHM-in məlumatına görə, verilən elektron rəqəmsal imzaların ümumi sayından dövlət strukturlarının payına 12 675 ədəd düşüb, 755 ədəd hüquqi şəxslərə, 5022 ədəd isə vətəndaşlara verilib.
"Elektron hökumət" portalına müraciətlərin sayında da əhəmiyyətli artım qeydə alınıb.
Martda müraciətlərin sayı 34 062 ədəd olub. Portala müraciətlərin ümumi sayı 2012-ci ilin dekabrından 2014-cü il martın 31-dək 566 105 ədəd təşkil edib. 2013-cü ilin dekabrından 2014-cü il martın 1-dək portala müraciətlərin sayı 532 043 ədəd olub. Hesabat dövründə portaldakı elektron xidmətlərdən 982 325 dəfə istifadə olunub.
"Elektron hökumət" portalında (e-gov.az) təsdiq edilmiş elektron xidmətlərin sayı 428 ədəd təşkil edib və portalda 253 elektron xidmətdən istifadə etmək mümkündür. Dövlət strukturlarının saytlarında yerləşdirilən elektron xidmətlərin ümumi sayı isə 459 ədəd təşkil edir.