Azərbaycan, Bakı, 15 sentyabr /Trend, müxbir Hüseyn Vəliyev/
Rabitə və Yüksək Texnologiyalar Nazirliyinin "Teleradio" İstehsalat Birliyi (İB) ölkənin rayonlarında 15 rəqəmsal TV ötürücü aparatı quraşdırıb. Bunu bazar ertəsi Trend-ə İB-dən deyiblər.
Ötürücü aparatlar Şamaxı, Quba, Göygöl, Gədəbəy, Tovuz, Daşkəsən, İsmayıllı, Yardımlı və Qazax rayonlarının kəndlərində quraşdırılıb.
Dövlət Radiotezliklər İdarəsinin (DRİ) Radiomonitorinq şöbəsi yaxın vaxtlarda rəqəmsal TV siqnalının səviyyəsini və əhatə dairəsini ölçəcək.
DRİ-nin əldə etdiyi məlumatlar əsasında İB-də rəqəmsal TV siqnalının zəif qəbul olunduğu yaşayış məntəqələri müəyyənləşdiriləcək və gələcəkdə quraşdırılacaq ötürcü aparatların dislokasiya yerləri üzrə təkliflər hazırlanacaq.
Hazırda respublika əhalisinin təqribən 98 faizi rəqəmsal TV siqnalı ilə əhatə olunub.
