Azərbaycan, Bakı, 29 sentyabr /Trend, müxbir Hüseyn Vəliyev/
Azərbaycanda analoq TV yayımının dayandırılacağı ilkin yaşayış məntəqələri müəyyənləşdirilib. Bu barədə bazar ertəsi Trend-ə "Teleradio" İstehsalat Birliyindən (İB) deyiblər.
İB-dən qeyd ediblər ki, rəqəmsal yayım standartına tam keçid respublikanın iri yaşayış məntələqində (Bakı, Şirvan), eləcə də rəqəmsal siqnalın 2-3 istiqamətdə çatdığı Mərkəzi Aran zonasında gözlənilir.
İB-dən deyiblər ki, ucqar ərazilər rəqəmsal TV-nin əhatə zonasına daxil olmayanadək həmin ərazilərdə analoq və rəqəmsal siqnalların yayımı paralel aparılacaq: "Dövlət Radiotezliklər İdarəsinin Radiomonitorinq şöbəsi respublikada rəqəmsal TV siqnalının səviyyəsi və əhatə zonası üzrə ölçü işləri aparıb. Əldə edilmiş məlumatlar əsasında rəqəmsal TV siqnalının zəif qəbul olunduğu yaşayış məntəqələri müəyyənləşib və gələcəkdə quraşdırılacaq ötürücü aparatların dislokasiya yerləri üzrə təkliflər hazırlanıb".
Qeyd edək ki, respublika əhalisinin təqribən 98 faizi rəqəmsal TV siqnalı ilə əhatə olunub.