Azərbaycan, Bakı, 28 oktyabr /Trend, müxbir Hüseyn Vəliyev/
Azərbaycanda rəqəmsal televiziya proqramlarına baxmaq üçün əhalinin aztəminatlı təbəqəsinin nümayəndələrinə dekoderlər 2015-ci ilin ortalarından tez verilməyəcək. Bunu Trend-ə Azərbaycanın telekommunikasiya bazarındakı mənbə deyib.
Onun sözlərinə görə, dekoderlərin güzəştli verilməsi proqramına daha əvvəl hökumət səviyyəsində baxılıb və dekoderlərin Azərbaycanda istehsalına dövlət sifarişinin verilməsindən sonra başlanılacaq.
Qeyd edək ki, dekoderlərin pulsuz verilməsində dövlət sosial yardımı alan ailələrə üstünlük veriləcək. Azərbaycanda 130 mindən çox ailə sosial yardım alır. Bu məqsədlər üçün 5,4 milyon manat ayrılması tələb olunur.
Bu ilin dekabrına Azərbaycan əhalisi rəqəmsal televiziya siqnalı ilə tam əhatə olunacaq. Hazırda ölkə əhalisinin 98 faizi rəqəmsal televiziyadan yararlanır. Ucqar ərazilərdə yerləşən yaşayış məntəqələri hələ istisna təşkil edir.
