Azərbaycan, Bakı, 7 noyabr /Trend, müxbirlər Elmira Tariverdiyeva, Təmkin Cəfərov/
İran 2015-ci ilin martına kimi ölkə daxilində məlumatların ötürülməsi gücünü 2,5 dəfə artırmaq məqsədilə "Europe-Persia Express Gateway" (EPEG) optik-terabit magistralını işə salmağa hazırlaşır. Bu barədə Trend-ə İranın rabitə və informasiya texnologiyaları naziri Mahmud Vaezi məlumat verib.
O, qeyd edib ki, EPEG çox vacib layihədir: "Layihə bir sıra ölkələrdə Süveyş kanalının təhlükəsizlik problemləri ilə bağlı işə salınıb. EPEG Avropa ilə Yaxın Şərq arasında iri həcmlərdə trafikin ötürülməsi üçün alternativ telekommunikasiya kanalını təmin edir".
2011-ci ilin iyununda 4 ölkənin aparıcı rabitə operatorlarından ibarət konsorsium yeni EPEG sisteminin tikintisi ilə bağlı saziş imzalayıb. İlkin gücü 540 (54×10) Gbit təşkil edən yeni sistem 2012-ci ilin dekabrında istismara verilib.
Yeni kabel sisteminin ümumi uzunluğu 10 min kilometrə yaxın, buraxılış qabiliyyəti isə 3,2 Tbit/s-dir.
M.Vaezinin sözlərinə görə, 3000 kilometrdən artıq EPEG şəbəkəsi İran ərazisindən keçir və ölkə gələcəkdə ümumi tutumun 10 faizindən istifadə etməyi planlaşdırır: "Layihə 2016-cı ilin əvvəlində tam işə salınacaq".
Nazir bildirib ki, hazırda şəbəkənin İran hissəsinin buraxılış qabiliyyəti 200 Gbit/s təşkil edir, lakin cari maliyyə ilində (2015-ci il martın 20-də başa çatır) 500 Gbit/s-dək artırılacaq: "Marşrut Azərbaycan və Omanı İran vasitəsilə birləşdirəcək".
