2006-cı ildə Azərbaycanın Rabitə və İnformasiya Texnologiyaları Nazirliyi və Rusiyanın İnformasiya Texnologiyaları və Rabitə Nazirliyi arasında əməkdaşlıq haqqında saziş imzalana bilər. Nazirlikdən Trend ə verilən məılumata görə, bu məsələ rabitə naziri Əli Abbasovun rəhbərlik etdiyi nümayəndə heyətinin mayın 22-23-də Daşkənddə keçiriləcək Regional Birlik Rabitə administrasiyalarının rəhbərləri Şurasının 35-ci iclasında iştirakı çərçivəsində müzakirə olunacaq. Bu günlərdə, həmçinin, MDB ölkələrinin rabitə administrasiyalarının iclası və RBR-in informatizasiya üzrə Əlaqələndirici Şurasının 9-cu iclası keçiriləcək.
"Sənədin rusiyalı nazir Leonid Reymanın Azərbaycana və ya Əli Abbasovun Rusiyaya səfəri zamanı imzalanması planlaşdırılır", - deyə nazirlikdən vurğulayıblar.
Bundan başqa, 2006-cı ilin iyulunda Azərbaycan nümayəndə heyətinin ABŞ-a səfəri zamanı bu ölkənin kommersiya departamenti ilə İT sahəsində "qarşılıqlı anlaşma haqqında" memorandum imzalanacaq.
"2006-cı ildə rabitə nazirinin Hindistan, Çin və digər ölkələrə səfərləri planlaşdırılır. Bu səfərlər zamanı analoji sənədlərin imzalanması istisna olunmur", - deyə nazirlikdən bildirilib.
