Rabitə və İnformasiya Texnologiyaları Nazirliyinin nümayəndə heyəti ABŞ-a səfər zamanı bu ölkənin dövlət idarələri, beynəlxalq təşkilatlar və İKT şirkətlərinin bir sıra nümayəndələri ilə görüşüb. Trend agentliyinin məlumatına əsasən, rabitə naziri Əli Abbasov deyib ki, səfər çərçivəsində Dünya Bankının nümayəndələrilə da görüşlər keçirilib.
Onun sözlərinə görə, müzakirələr zamanı məlum olub ki, DB Azərbaycanda "elektron hökumət" modelinin yaradılması layihəsini yüksək qiymətləndirir.
"Onlar bildiriblər ki, bu layihənin gerçəkləşdirilməsi üçün Azərbaycana $30 mln ayırmağa hazırdırlar" -deyə nazir qeyd edib.
Hazırda həmin istiqamətdə danışıqlar aparılır və əgər uğurlu nəticə alınarsa, layihənin həyata keçirilməsinə başlanacaq.
Nazir ilin sonuna qədər hökumətin bu məsələdə dəstək göstərəcəyinə və layihənin həyata keçiriləcəyinə ümidvar olduğunu bildirib.
DB-nin köməkliyilə Azərbaycanda "Maliyyə xidmətlərinin inkişafı" üzrə layihə gerçəkləşdirilir ki, bunun əsas komponentləri ölkənin poçt şəbəkəsinin müasirləşdirilməsidir. Bu layihə üçün bank $12,25 mln. kredit ayırıb.
