Bakıda informasiya texnologiyaları üzrə BakuTel-2006 12-ci beynəlxalq sərgi və konfransı ərəfəsində Azərbaycanın Qlobal İnkişaf və İKT Alyansının regional nazirlərinin II iclası keçiriləcək. Bu barədə Trend ə ölkənin Rabitə və İnformasiya Texnologiyaları Nazirliyindən məlumat verilib.
Alyans Tunis sammitinin qərarı ilə BMT-nin informasiya təminatı üzrə dövlətlərarası münasibətlərin tənzimlənməsi məqsədilə yaradılıb.
Oktyabrın 2-də keçiriləcək iclasda müxtəlif dövlət qurumları və İT sahəsində məşğul olan təşkilatların 10-dan çox rəhbər şəxslərinin iştirakı gözlənilir. Alyansın 1-ci sammiti 18-21 iyunda Kuala-Lumpurda keçirilib. Bu sammitdə rabitə naziri Əli Abbasov iştirak edib. O, sammitə BMT-nin iqtisadi və sosial məsələlər üzrə departamentinin başçısı, BMT-nin İKT üzrə xüsusi işçi qrupunun rəhbəri Sarbuland Xan tərəfindən dəvət olunub.
İnformasiya Cəmiyyəti üzrə Ümumdünya Sammitinin (WSIS) Cenevrə və Tunis mərhələlərində fəallığına görə Əli Abbasov Qlobal Alyansın ali orqanı olan Strateji Şuranın üzvü seçilib.
