Paris məhkəməsi Maltanın "FIMbank"ı (First International Merchant) ilə bağlı Rabitə və İnformasiya Texnologiyaları Nazirliyi qismində Azərbaycanın müraciətinə baxır. "FIMbank" guya Rabitə Nazirliyi və "Pochtbank" SKB-nın zəmanəti ilə Rabitə Nazirliyinin mövcud olmayan Aztell və Baktell müəssisələrinə müvafiq olaraq $3035000 və $1560000 məbləğində ayırdığı kreditin ödənilməməsi faktı üzrə 2004-cü ilin iyul ayında Azərbaycan hökumətinə qarşı iddia qaldırıb.
Rabitə və İnformasiya Texnologiyaları Nazirliyindən Trend ə verilən məlumata görə, bu ay baş tutmuş məhkəmədə Azərbaycan tərəfi bir qədər əvvəl məhkəməyə təqdim etdiyi müraciətə müvafiq olaraq bütün lazım olan əlavə sənədləri təqdim edib.
Paris məhkəməsi Azərbaycanın Fransanın "Eutelsat S.A" şirkətinə yatırdığı 500 min səhminə və onların 1 mln. dollarlıq dividentlərinə həbs qoyub. Vəsaitlər xüsusi hesabda girov saxlanılır. Məhkəmənin son qərarı ilə Paris məhkəməsinin qiymətləndirdiyi 6,5 mln. avro məbləğində olan bu vəsait avtomatik olaraq xeyrinə hökm çıxarılmış tərəfin balansına keçəcək. Azərbaycan tərəfinin müraciəti məhz məhkəmənin hesabla bağlı qərarını ləğv etməsi ilə bağlıdır.
"Bank prosesi ləngitmək üçün məhkəmənin tarixini daha gec bir vaxta keçirilməsinə nail olmaq istəyirdi. Amma məhkəmə Azərbaycan tərəfinin materiallarını qəbul etdi. Son qərar dekabrın 10-da veriləcək", - deyə nazirlikdən bildiriblər.
