Azərbaycan Rabitə və İnformasiya Texnologiyaları Nazirliyi dekabrın 4-dən 8-dək Honkqonqda keçirilən "Telekom -2006" (İTU Telesom 2006) sərgisi çərçivəsində gənclər forumunda iştirak edir. Nazirlikdən Trend ə verilən məlumata görə, forumda Rabitə Nazirliyinin informasiya inkişafı cəmiyyəti şöbəsinin aparıcı məsləhətçisi İlahə Rzayeva iştirak edir.
O, bu forumda iştirak hüququnu dünya xalqlarının həyat şəraitinin yaxşılaşdırılması üçün informasiya-rabitə texnologiyalarından istifadə mövzusunda beş səhifəlik esse yazdığına görə qazanıb.
6 günlük forum dünya gənclər şəbəkəsinin yaranması, müxtəlif sahələrdə debatların keçirilməsi, biliklərin bölüşülməsi, İnformasiya və Telekommunikasiya texnologiyalarının köməyilə ölkələrdə yaşayış şəraitinin yaxşılaşdırılması perspektivlərini müzakirə edilməsinə yönəldilib.
İlk dəfə 2001-ci ilin mayında Afrikada keçirilən forum Beynəlxalq Elektrik rabitə İttifaqı (BEİ) üzvləri və universitet təmsilçiləri ilə 190 ölkəyə yayılıb.
Bu sərgi Telekommunikasiya və informasiya texxnologiyaları sferasında dünyanın aparıcı şirkətlərinin: beynəlxalq elmi institutların avadanlıq istehsalçılarının, proqram təminatçılarının, rabitə operatorlarının, inteqratorların, yüksək texnologiyaların işlənmə və çatdırılmasını təqdim edən ən sanballı sərgilərdəndir. Sərginin təşkilatçısı Beynəlxalq Telekommunikasiya Birliyidir (İnternational Telecommunication Union).
