Bakı Telefon Rabitəsi İstehsalat Birliyi (BTRİB) tarif gəlirləri üzrə illik proqnozu 101,4% yerinə yetirib. 24800 min manat proqnoza qarşı 25159 min manat gəlir əldə edib.
Trend Rabitə və İnformasiya Texnologiyaları Nazirliyinə istinadən xəbər verir ki, telefon aparatlarının sayının artırılması üzrə işlər 104,1% yerinə yetirilib (25 min ədədə qarşı 26016 aparat).
Bundan başqa, BTRİB Bakı qəsəbələrinin sosial-iqtisadi inkişafının sürətləndirilməsi üzrə tədbirlər proqramı ilə Rabitə Nazirliyi üçün nəzərdə tutulmuş bütün tədbirləri yerinə yetirib.
BTRİB dövlət hakimiyyət və idarə orqanlarına, müəssisə və təşkilatlara, xarici hüquqi şəxslərə, onların nümayəndəliklərinə və Bakı şəhər əhalisinə yüksək keyfiyyətli hər növ telefon xidmətini və radio rabitəsini göstərir. Birlik tam təsərrüfat hesabı və özünü maliyyələşdirmə prinsipləri əsasında fəaliyyət göstərir. İB öz funksiyalarının bir hissəsini Telefon Qovşaqları (TQ) struktur bölmələri və Xətai TQ, Yasamal TQ, Nizami TQ, Sabunçu TQ, Əzizbəyov TQ, Qaradağ TQ kimi hüquqi şəxs statuslu müəssisələr, Bakı Telefon Avtomatlar Qovşağı, Bakı Şəhəri Radioyayım Qovşağı, Bakı kabel Qovşağı, Rabitə avadanlıqlarının tikinti və təmir idarəsi, "Azərrabitəlayihə" layihə-tədqiqat kontoru vasitəsilə həyata keçirir.