Azərbaycan Qazaxıstanın KazSat rabitə peykindən istifadə etmək niyyətində deyil. Bu barədə Trend ə Azərbaycanın Rabitə və İnformasiya Texnologiyaları Nazirliyindən məlumat verilib.
"Biz bu peykdən istifadə üzrə təklifləri öyrəndik və belə bir nəticəyə gəldik ki, bu, həm tariflərə görə, həm də ərazinin əhatə olunmasına görə bizim üçün məqsədəuyğun deyil", - deyə nazirlikdən bildirilib.
Hazırda Azərbaycan öz rabitə peykinin buraxılması üzrə işlər görür və bu məsələ ilə bağlı Beynəlxalq Elektron Rabitə İttifaqı ilə (ITU) danışıqlar aparır.
Azərbaycan hazırda Türkiyə və Avropa peyklərindən istifadə edir.
KazSat peyki Xruniçev adına Rusiya dövlət kosmik elm-istehsalat mərkəzi tərəfindən hazırlanıb. Aparat 72 MHs keçirmə zolağı ilə 40 və 90 Vt gücə malik Ku-diapazonlu 12 transponderlərlə təchiz olunub. Peykin əhatə zonası Qazaxıstan, Mərkəzi Asiya, Qafqaz respublikalarını, Mərkəzi Rusiyanın bir hissəsini əhatə edir.
Mütəxəssislərin hesablamalarına görə, KazSat peykindən tam gücü ilə istifadə etmək Qazaxıstana öz iqtisadiyyatında ildə 25-27 ABŞ dollarına qədər vəsait saxlamağa imkan verəcək. Bu vəsaitlər hazırda peyk rabitəsi operatorları tərəfindən xarici peyk şirkətlərinə təqdim etdikləri xidmətlərə görə ödənilir.
