Naxçıvan Muxtar Respublikasında (NMR) CDMA (Code Division Multiple Access- kod bölməsi ilə çoxsaylı çıxış sistemi) şəbəkəsi genişlənir. Trend NMR-in Rabitə və İnformasiya Texnologiyaları Nazirliyinə istinadən xəbər verir ki, hazırda muxtariyyatın ərazisində 12 baza stansiyasının quraşdırılması üzrə işlər və şəbəkənin idarə olunmasının mərkəzi sisteminin nizamlanması üzrə son işlər başa çatır.
Quraşdırılmış simsiz CDMA şəbəkəsi yaşayış ərazilərinin 70%-ni əhatə edəcək və 10 min abunəçiyə xidmət göstərəcək.
Hazırda şəbəkə artıq 060 zona kodu və 7 rəqəmli (540 XX XX) prefiksi alıb. Həmçinin digər operatorlarla rouminq əlaqələrinin yaradılması imkanı da var.
CDMA texnologiyası NMR-də ötən il mart ayının əvvəlində tətbiq olunub və bu münasibətlə Naxçıvanda NMR-in rabitə və informasiya texnologiyaları naziri Rövşən Məmmədovun, NMR Ali sovetinin sədri Vasif Talıbov və dövlət strukturlarının başqa nümayəndələrinin iştirakı ilə mərasim keçirilib.
CDMA şəbəkəsinin tətbiq edilməsi üzrə işlər NMR Rabitə Nazirliyi və Çinin Huawei şirkəti arasında imzalanmış müqavilə əsasında həyata keçirilib.
CDMA şəbəkəsindən başqa, NMR-də Azərcell Telecom şirkəti ilə yanaşı, ötən ildən Bakcell şirkəti də mobil xidmətlər göstərməyə başlayıb.
İlk dəfə kommersiya məhsulu kimi 1995-ci ildə təqdim olunmuş CDMA dünyada ən sürətli yayılan simsiz texnologiyalardan biridir. 1999-cu ildə Beynəlxalq Telekommunikasiya İttifaqı (International Telecommunications Union) yeni "üçüncü nəsil" (3G) simsiz sistemlər üçün sənaye standartı qismində CDMA şəbəkəsini seçib.