Azərbaycan, Bakı/ Trend S.Babayeva/ Azərbaycanın SİNAM şirkəti və İT sahəsində çalışan bir çox şirkətlər kadr çatışmazlığı problemi ilə üzləşib. Bunu "Rabitə dünyası" qəzetinə müsahibəsində SİNAM şirkətinin rəhbəri Elçin Əliyev bildirib.
Onun sözlərinə görə informasiya texnologiyalarının inkişafı prosesində bu çox ciddi hiss olunur.
"Bizə yeni biznes layihələr üçün mütəxəssislər lazımdır. Ancaq hazırda ölkədə bu kadrların hazırlanması ilə məşğul olan təhsil sistemi bu standartlara cavab vermir",-deyə Elçin Əliyev söyləyib.
Şirkət rəhbərinin sözlərinə görə, SİNAM şirkəti İT sahəsində mütəxəssis hazırlığı üçün nəzərdə tutulmuş proqramda partnyor kimi iştirak etməyə hazırdır. Bunun üçün şirkət iki illik təhsil proqramı təklif edir. Artıq SİNAM bu istiqamətdə ABŞ-ın bir neçə treyninq qurumu ilə danışıqlar aparır və müəyyən bir nəticə olaraq Global Learning Foundation-la birgə Azərbaycanda proqramçıların hazırlanması planalaşdırılır.
1994-cü ildə yaradılmış SİNAM şirkəti Azərbaycanın İT sahəsində ən iri müəssisələrdən hesab olunur.
Şirkətin əsas fəaliyyət istiqamətlərinə inteqrasiya sistemi, iri telekommunikasiya layihələrinin hazırlanması, dünya standartlarına uyğunluq, proqram təminatının hazırlanması, texnoloji proseslərin avtomatlaşdırılması və idarə olunması sahəsində mürrəkəb sistemlərin hazırlanması, məlumatların ötürülmə şəbəkəsinin qurulması, məlumat bazalarının yaradılması və inkişafı, telekommunikasiya sahəsində konsaltinq və digər xidmətlər göstərilməsi və s. daxildir.
Bu gün şirkətin daxilində xüsusi elmi şöbə yaradılıb ki, bura da İT sahəsində bir neçə aparıcı mütəxəssis dəvət olunub. Azərbaycan Millli Elmlər Akademiyasının Kibernetika İnstitutunun direktoru Telman Əliyevlə SİNAM-ın elmi məsləhətçi kimi cəlb olunması barədə razılığa gəlinib.