Azərbaycan, Bakı, 18 mart /Trend, müxbir H.Vəliyev/
"Bakı Telefon Rabitəsi" İstehsalat Birliyi ümumi istifadə edilən telefon şəbəkəsinin tam elektronlaşdırılmasını aprelin ortalarına kimi başa çatdıracaq. Bu barədə cümə günü Trend-ə İB-nin baş direktor müavini Xankişi Kişiyev bildirib.
Onun sözlərinə görə, bu gün 494/495/438/439 ATS-lərdə yeni avadanlıqların quraşdırılması və köhnə nömrə tutumlarının yeni xətlərə keçirilməsi üzrə işlər aparılır.
"İşlər başa çatdıqdan sonra operatorun telefon infrastrukturu tam şəkildə elektron formaya keçiriləcək", - Kişiyev deyib.
Yenidənqurmadan sonra abonentlərin yeni telefon nömrələri mövcud nömrələrin ardıcıllığının saxlanması ilə "5" rəqəmi ilə başlayacaq. Hər bir abonent qoşulma və telefonun yeni nömrəsi haqqında məlumatlandırılacaq.
Operatorun planlarına köhnəlmiş DMS texnologiyası ilə işləyən 493-cü ATS-in yenidənqurulması da daxildir.
Bütün telefon stansiyaları tətbiqi prioritet vəzifələrdən biri olan növbəti nəsil (NGN - Next Generation Network) şəbəkələrinin bazasına əsaslanır. Yeni sistem operatora rabitə xidmətlərinin ənənəvi növləri ilə yanaşı, IP-telefoniya, genişzolaqlı internet və IP-TV xidmətlərini də göstərməyə imkan verir. Bu günədək operatorun şəbəkəsində fəaliyyət göstərən ATS-lərin 60 faizi növbəti nəsil şəbəkələrinin bazasına əsaslanır.
"Bakı Telefon Rabitəsi" İstehsalat Birliyində davamlı rabitə və genişzolaqlı iİnternet xidmətləri göstərmək üçün şəbəkə həllərindən, routerlərdən, ATS-lər arasında məlumatların ötürülməsi sürətini 1 Gbit/saniyədən 10 Gbit/saniyəyə çatdıran DATA-şəbəkənin təşkilinə imkan verən "Huawei", ZTE və "Cisco" şirkətlərinin telekommunikasiya avadanlıqlarından istifadə olunur.
Şəbəkənin müxtəlif seqmentlərində operator tərəfindən SDH-Ethernet alternativ şəbəkəsi fəaliyyət göstərir ki, bu da mövcud SDH şəbəkəsi üzrə E1 əlaqə kanalının üst IP-şəbəkələrini təşkil etməyə imkan verir.