...

Taliban Əfqanıstanın Kabil-Qəndəhar magistral yoluna tam nəzarət edir

Dünya xəbərləri Materials 1 Sentyabr 2008 15:50 (UTC +04:00)

Əfqanıstan, Kabil, 01 sentyabr / Trend , A. Həkimi / Kabil-Qəndəhar magistral yolunda təhlükəsizlik postları olmasına baxmayaraq, bu magistral yol hələ də hökumətə qarşı çıxan qrupların gizləndiyi əsas yerdir. Magistral yol boyu post-patrul xidməti məntəqələri ilə yanaşı, ara-sıra yanmış tanklar, mina partlayışından yolun ortasında yaranmış çalalara da rast gəlinir.

Trend un Əfqanıstandakı müxbirinin məlumatına əsasən, magistral yolda nəzərəçarpan məqamlardan biri də odur ki, Talibanın əksər hücumları yaşayış olan regionlarda baş verir və yanmış hərbi texnikanın qalıqları da daha çox bu regionlardadır. Hökumət qüvvələri və müxalif qüvvələr arasında baş verən toqquşmalar əsasən Dərani, Seyidabad, Çeşməsalar və Şişqüllə kimi regionlarda baş verir.

"Yol boyu görüşdüyümüz sürücülər, insanlar bizimlə söhbətdə bildirirlər ki, regionda yaşayan əhali daha çox Talibanı dəstəkləyir və məhz onların dəstəyinə söykənərək Taliban belə hucmlar edə bilir. Taliban bu ərazidə sıx bağlarda və tarlalarda pusqu qurmaqla bu magistral yolu daim nəzarətdə saxlayır", - deyə Trend -un Əfqanıstandakı müxbiri bildirib.

Taliban qüvvələri ara-sıra magistral yolda neft və ərzaq daşıyan maşınlara da hücum etməklə qarət edirlər. Polis qüvvələri isə onların izinə düşə bilmir.

Hazırda bu magistral yolda neft daşıyan maşınları və ərzaq karvanlarını qarət Taliban qüvvələri üçün gəlir mənbəyinə çevrilib.

Qəzney vilayətinin Qarbağ qəsəbəsində isə Taliban qüvvələri qarət etdikləri nefti öz nəzarətləri altında olan rigonlarda ucuz qiymətə əhaliyə satırlar.

Bu qarətlərdə ən çox diqqəti çəkən odur ki, Taliban qüvvələri hökumət rəsmiləri və təhlükəsizlik qüvvələrinin hansı avtomobillə, neçə nəfər heyətlə və bu maqistral yoldan nə vaxt keçəcəkləri haqda dəqiq və müfəssəl məlumata malik olurlar. Bu onu göstərir ki, dəqiq məlumat toplamaq üçün Taliban ictimaiyyət arasında güclü kəşfiyyat fəaliyyəti aparır.

Elə bu səbəbdən də Talibanın əksər hücumları uğurla nəticələnir. Digər bir məsələ, magistral yol boyu bütün bağların və evlərin Talibanın ixtiyarında olmasıdır. Əslində, hökumət ərazidəki ağsaqqallara razılığa gələrək, belə hücumları azalda bilər. Təhlükəsizlik postları qoymaqla yanaşı, əgər Talibanın ixtiyarında olan kəndlərə də nəzarət olunarsa, təhlükəsizlik daha yaxşı təmin edilə bilər.

Hazırda Kabil-Qəndəhar magistral yolunda maşınların hərəkəti az nəzərə çarpır və əhali məcburiyyət qarşısında yoldan istifadə edir.

Müəlliflə əlaqə saxlamaq üçün elektron ünvan [email protected]

Xəbər lenti

Xəbər lenti