Azərbaycan, Bakı, 06 oktyabr/ Trend , müxbir Ü.Sadıqova/Muxtariyyətdə hərbi vəziyyətin olmasına və Israillə münaqişəyə baxmayaraq, Fələstin gənclərinin orta və ali təhsil almaq imkanı var, - bazar ertəsi Bakıda Trend -a ISESСO - nun İslam ölkələrində təhsil və elm problemlərinə həsr edilmiş konfransında iştirak edən Fələstin nümayəndə heyətinin nümayəndəsi Camal Hüseyn deyib.
Konfrans Bakıda oktyabrın 6-dan 8-dək keçirilir. Konfransda İslam Konfransı Təşkilatı ölkələrinin təhsil nazirləri iştirak edirlər.
"İsrailin muxtariyyətlə sərhədləri bağlaması fələstinli tələbələrə təhsillərini xaricdə başa vurmağa mane olur", - Fələstin Muxtariyyəti Təhsil Nazirliyinin ali təhsil şöbəsinin müdiri Hüseyn bildirib.
Onun sözlərinə görə, Fələstin və İsrail münaqişəsi Fələstin Muxtariyyəti hökumətinə fələstinlilərin təhsil almasına iri maliyyə vəsitlərini qoymağa imkan vermir ki, bu da adı çəkilən sahənin inkişafını dayandırır.
Hüseynin sözlərinə görə, buna baxmayaraq, Fələstin muxtariyyəti hökuməti İSESCO və UNESCO - nun dəstəyi ilə məktəb və universitet şəbəkələrini genişləndirir.
"Hazırda muxtariyyətdə 49 təhsil müəssisəsi fəaliyyət göstərir ki, onlardan da 14-ü universitetdir", - o deyib.
Təhsil müəssisələri hən Qərb Sahilində, həm də Qəzzə Bölgəsində fəaliyyət göstərir.
"Muxtariyyətdəki daxili parçalanma Fələstin xalqının təhsil almasına təsir etmir. Bizim həm Qərb Sahilində, həm də Qəzzə Bölgəsində təhsil müəssisələrinin şəbəkəsini genişləndirmək imkanımız var", - Hüseyn əlavə edib.
