Beynəlxalq vasitəçilərdən ibarət "Dördlük" (RF, ABŞ, BMT, AB) İsraili Fələstin ərazilərində yaşayış obyektlərinin tikintisinə son qoymağa çağırıb. Vasitəçilər hesab edir ki, bu, Fələstin-İsrail danışıqlarına mənfi təsir göstərir. Bu barədə "kvartet"in XİN başçıları səviyyəsində Nyu-Yorkda BMT mənzil-qərargahında keçirilən görüşündən sonra yayılan məlumatda bildirilir.
Görüşdə Rusiya XİN başçısı Sergey Lavrov, ABŞ dövlət katibi Kondoliza Rays, BMT baş katibi Pan Gi Mun, AB-nin xarici siyasət üzrə ali komissarı Xavyer Solana və AB-nin komissarı Benita Ferrero-Valdner iştirak ediblər. Fransa XİN başçısı Bernar Kuşner və "dördlüyün" xüsusi nümayəndəsi Toni Bleyer Nyu-Yorka gələ bilmədikləri üçün diskussiyada video-bağlantı vasitəsi ilə iştirak ediblər.