Bakı. Rufiz Hafizoğlu - Trend:
Türkiyə terrorçuları tam məhv edənədək mübarizəni davam etdirəcək. Trend-in məlumatına görə, bu barədə Türkiyənin xarici işlər naziri Mövlud Çavuşoğlu "Tvitter" sosial şəbəkəsindəki mikrobloqunda yazıb.
M.Çavuşoğlu qeyd edib ki, Ankaradakı terror Türkiyə dövlətçiliyinə qarşı yönəldilib: "Terrorçular güclü və demokratik Türkiyəyə şərtlərini diktə edə bilməyəcəklər".
Xatırladaq ki, bu gün "Sözçü" qəzeti Ankaradakı terror aktının törədilməsində iştirak etdiyi güman edilən qadının adını açıqlayıb.
Qəzetin məlumatına görə, terrorçu-intiharçının PKK terror təşkilatının üzvü Səhər Çağla Dəmir olduğu ehtimal edilir.
Türkiyə hakimiyyəti bu məlumatı hələ rəsmi olaraq təsdiq etməyib.
Qeyd edək ki, paytaxt Ankarada martın 13-də terror aktı törədilib. Türkiyənin səhiyyə naziri bildirib ki, güclü partlayış nəticəsində ölənlərin sayı 37, yaralananların sayı isə 125 nəfərə çatıb.