Bakı. Trend:
Türkiyə Böyük Millət Məclisinin iclasında Beynəlxalq Atom Enerjisi Agentliyinə (BAEA) Ermenistanda yerləşən Metsamor Atom Elektrik Stansiyası ilə bağlı tədbir görülməsi tələbi ilə müraciət edilib.
Trend-in məlumatına görə, Türkiyə parlamentinin iclasında bildirilib ki, həmin atom elektrik stansiyası Türkiyə sərhədlərindən 16 km aralıda yerləşir.
Məlumata əsasən, vətəndaşlardan parlamentə daxil olan ərizə və şikayətləri təhlil edən Türkiyə Böyük Millət Məclisinin Müraciət Komissiyasına atom elektrik stansiyasının yaratdığı risklərə qarşı tədbir görülməsi tələbi daxil olub.
Komissiya bu məsələ ilə bağlı nazirlik, qurum və təşkilatlar tərəfindən verilən məlumatlar əsasında müraciətə cavab verib.
Parlament komissiyasının cavabında bildirilib ki, radiasiya ilə bağlı fövqəladə hallar ilə bağlı regional seminar keçirilib, onun məqsədi İğdır şəhərinin sakinləri üçün məlumatlandırma tədbirləri keçirməklə əhalinin maarifləndirilməsi olub.
Türkiyə BMM-dən verilən cavabda bildirilir ki, İğdır şəhərinin sərhəd kəndlərində məlumatlandırma tədbirləri keçirilib, Səhiyyə Nazirliyi ilə razılaşdırılaraq yod həbləri verilib, onların paylanması və lazımi yerlərdə saxlanması təmin edilib. Həm də radiasiya qəzası zamanı yerli səviyyədə tədbirlər görülür.
Türkiyə Xarici İşlər Nazirliyi vurğulayıb ki, BAEA və Avropa İttifaqı zavodun təhlükəsizlik statusunun müasir texniki standartlara cavab vermədiyini müəyyən edib. Agentlik zavodun struktur çatışmazlıqları ilə bağlı təhlükəsizliklə bağlı çatışmazlıqların aradan qaldırılması istiqamətində fəaliyyətini davam etdirir. BAEA əməkdaşları vaxtaşırı Ermənistana səfərlər və yoxlamalar aparır və hər bir təhlükəsizlik missiyasından sonra ətraflı hesabat tərtib edilir.
"Stansiya bütün region üçün risk faktorudur. Ölkəmiz həm BAEA-nin baş konfranslarında, həm də beynəlxalq ictimaiyyətə lazımi müraciətlər edərkən bu risklərdən danışır. Bölgəmiz və dünya ikinci Çernobılın öhdəsindən gələ bilməz. Metsamor Atom Elektrik Stansiyası bağlanmalıdır. Bu baxımdan bu problem bundan sonra da ölkəmizin daim diqqətində olacaqdır", - deyə Türkiyə XİN-də bildirilib.