Bakı. Trend:
Türkiyə hüquq - mühafizə orqanları İstanbul, Van, Şanlıurfa, Elazığ, Dücze, Diyarbakir, Bursa, Edirne, Kırlareli, Kilis, Iğdır, Hatay, Adana, Kahramanmaraş və Dənizli vilayətlərində əməliyyat keçirib.
Trend xəbər verir ki, bu barədə Türkiyə daxili işlər naziri Ali Yerlikaya “X”də yazıb.
O bildirib ki, bölücü terror təşkilatına (BTÖ) qarşı keçirilən əməliyyatda 37 nəfər saxlanılıb.
Həmçinin, Ağrı vilayətində sərhədi qanunsuz keçməyə çalışan 2 terrorçu məhv edilib.
Nazir terrorçulara qarşı mübarizənin sonadək davam edəcəyini bildirib.
Qeyd edək ki, Türkiyənin təhlükəsizlik qüvvələri bütün ölkə ərazisində “Kahramanlar” kod adı ilə miqyaslı antiterror əməliyyatına başlayıb. Əməliyyatlar PKK qruplaşmasının Ankarada Daxili İşlər Nazirliyinin binası qarşısında törətdiyi partlayışdan sonra start götürüb.