Bakı. Trend:
ABŞ "Crocus City Hall"da planlaşdırılmış terror aktına dair bütün məlumatları Rusiyaya ötürməyib.
Trend xəbər verir ki, bu barədə "The New York Times" qəzeti yazıb.
Nəşrin məlumatına görə, Vaşinqton Moskvanın ABŞ xüsusi xidmət orqanlarının informatorlarını və onların kəşfiyyat metodlarını öyrənə biləcəyindən ehtiyat edib.
Qeyd olunub ki, ABŞ və Rusiya arasındakı qeyri-dost münasibətlər amerikalı məmurların terror aktı barədə bütün məlumatları rusiyalı həmkarları ilə bölüşməsinə mane olub.
Qeyd edək ki, "Crocus City Hall"da törədilən terror aktında ölənlərin sayı 143 nəfərə çatıb.
Xatırladaq ki, martın 22-də Rusiyanın Moskva vilayətinin
Krasnoqorsk şəhərində yerləşən "Crocus City Hall"a daxil olan
naməlum şəxslər insanlara atəş açıblar. Hadisə "Piknik" qrupunun
konsertindən öncə baş verib.
Rusiya Federal Təhlükəsizlik Xidmətinin rəhbəri Aleksdanr Bortnikov
Rusiya prezidenti Vladimir Putinə Moskvada "Crocus City Hall"da
törədilən terror aktında iştirak edən 11 nəfərin, o cümlədən 4
terrorçunun saxlanıldığı barədə məlumat verib.
Xəsarət alanların xilas edilməsi və axtarışı üzrə bütün tədbirlər yekunlaşıb.
"Crocus City Hall" konsert zalında terror aktı törətməkdə ittiham olunan şəxslər barəsində həbs qətimkan tədbiri seçilib. Beləliklə, məhkəmənin qərarı ilə terror aktını törətməkdə ittiham olunan Dalercon Mirzoyev, Saidakrami Raçabalizoda, Şamsidin Fariduni və Mahammadsobir Fayzov istintaq təcridxanasına yerləşdirilib.