Bakı. Trend:
Miçoakan ştatının Koauayana bələdiyyəsində polis bölməsinə şənbə günü həyata keçirilən bomba hücumu nəticəsində ölənlərin sayı beşə yüksəlib.
Trend xəbər verir ki, bu barədə ştatın Baş Prokurorluğu məlumat yayıb.
Prokurorluğun açıqlamasında bildirilib ki, partlayışda məhv olan bir SUV avtomobili hadisə yerində iki nəfərin cəsədi ilə birlikdə tapılıb. Hücum nəticəsində səkkiz polis əməkdaşı da yaralanıb. Onlar xəstəxanaya yerləşdirilib və sonradan onlardan üçünün tibbi yardım göstərilərkən öldüyü təsdiqlənib.
Qurum əlavə edib ki, hadisəni araşdırmaq məqsədilə prokurorluq əməkdaşları, həmçinin milli müdafiə, dəniz qüvvələri, ictimai təhlükəsizlik və mülki müdafiə nazirliklərinin nümayəndələri əraziyə ezam olunub.
Ştat Baş Prokurorluğu hadisənin araşdırılması ilə bağlı federal qurumlarla əməkdaşlığın davam etdiriləcəyini vurğulayıb.