Bakı. Trend:
“S&P Global Ratings”in proqnozuna görə, Azərbaycan banklarının yaxın illərdə beynəlxalq borc bazarlarında borclanmanı əhəmiyyətli dərəcədə artıracağı ehtimalı çox aşağıdır.
Bu barədə Trend “S&P”-yə istinadən məlumat verir.
“Xalis xarici maliyyələşmə məhduddur. Qiymətləndirməmizə əsasən, 2025-ci ilin sonuna Azərbaycan bank sisteminin xalis xarici borcu mənfi olub. Xarici borcun böyük hissəsi beynəlxalq maliyyə institutlarının — o cümlədən Beynəlxalq Maliyyə Korporasiyası və Avropa Yenidənqurma və İnkişaf Bankının — eləcə də bankların xarici minoritar səhmdarlarının kreditlərinin payına düşür. Mülayim iqtisadi perspektivlər və Azərbaycan banklarının kifayət qədər böyük depozit bazası nəzərə alınaraq, yaxın illərdə beynəlxalq borc bazarlarında borclanmanın əhəmiyyətli dərəcədə artacağını gözləmirik. Daxili borc bazarları kiçikdir və buna görə də bankların maliyyələşməsi üçün həyat qabiliyyətli alternativ hesab edilmir”,- S&P-nin hesabatında bildirilir.
Qeyd edək ki, Azərbaycan Mərkəzi Bankının məlumatına görə, Azərbaycanın strateji valyuta ehtiyatları 2025-ci ildə 14 milyard ABŞ dolları və ya 19,8% artaraq 85,1 milyard ABŞ dollarına çatıb. Azərbaycan Mərkəzi Bankının valyuta ehtiyatları 2025-ci ildə 5,1% artaraq ilin sonunda 11,5 milyard ABŞ dollarına çatıb.
Ölkənin ümumi strateji valyuta ehtiyatları beynəlxalq səviyyədə tanınmış adekvatlıq standartlarını aşmağa davam edir. Beləliklə, 2025-ci ilin dekabr ayının sonunda strateji valyuta ehtiyatları 38 aylıq mal və xidmət idxalını (2025-ci ilin ilk doqquz ayı üzrə idxal da daxil olmaqla) kifayət qədər əhatə etmişdir. Strateji ehtiyatlar manatla pul kütləsindən 3,6 dəfə çoxdur (1 yanvar 2026-cı il tarixinə M2 pul aqreqatına görə).
Bu göstəricilər ölkənin xarici və daxili iqtisadi şoklara qarşı dayanıqlığını nümayiş etdirir və həmçinin dövlət borcu risklərinin tamamilə idarəolunan səviyyədə olduğunu göstərir.