Bakı. Trend:
Azərbaycan və Moldova arasında təbii qaz və bərpa olunan enerji sahəsində yeni əməkdaşlıq imkanları müzakirə edilib.
Trend xəbər verir ki, bu barədə Azərbaycanın energetika naziri Pərviz Şahbazov "X" hesabında paylaşım edib.
"Məşvərət Şurası nazirlərin iclasları ərəfəsində Moldovanın energetika naziri Dorin Junqetu ilə keçirilən görüşdə təbii qaz və bərpa olunan enerji sahəsində yeni əməkdaşlıq imkanlarını dəyərləndirdik", - paylaşımda qeyd edilib.
Qeyd edək ki, ötən il energetika naziri Pərviz Şahbazov
Azərbaycanda səfərdə olan Moldova Respublikasının Baş nazirinin
müavini, infrastruktur və regional inkişaf naziri Vladimir Boleanın
rəhbərlik etdiyi nümayəndə heyəti ilə görüşdə iki ölkə arasında
enerji sahəsində mövcud və perspektiv əməkdaşlıq məsələləri
ətrafında fikir mübadiləsi aparıb.
Enerji səmərəliliyi, bərpa olunan enerji mənbələrinin təşviqi və
enerji tənzimlənməsi sahələrində qarşılıqlı əlaqələrin
genişləndirilməsi istiqamətində atılacaq addımlar müzakirə
edilib.
Həmçinin Moldovanın Azərbaycandan neft məhsulları və təbii qaz
idxalında maraqlı olduğu bildirilib.
Eyni zamanda həmin görüş zamanı Moldovada bioenerji və bioqaz
sahələrində investisiya əsaslı əməkdaşlıq imkanları, ölkədə mövcud
yaşıl güclər, həyata keçirilən bərpa olunan enerji hərracları
barədə ətraflı məlumat verilib, Azərbaycan şirkətlərinin bu
istiqamətlərdə reallaşdırılacaq layihələrdə iştirakı üçün
imkanların mövcudluğu diqqətə çatdırılıb.