Bakı. Trend:
ABŞ hökuməti ABŞ, Venesuela və Amerika müttəfiqlərinin maraqları naminə Venesuela neftini dünya bazarında satmağa başlayıb.
Trend-in məlumatına görə, bu barədə ABŞ Energetika Nazirliyi məlumat yayıb.
"Bu neft və neft məhsullarının satışını asanlaşdırmaq və maliyyə dəstəyi təmin etmək üçün aparıcı qlobal əmtəə təchizatçıları və əsas bankları cəlb etmişik", - deyə bildirilib.
Qeyd edilib ki, Venesuela neft və neft məhsullarının satışından əldə edilən bütün gəlirlər, gəlirlərin son bölüşdürülməsinin qanuniliyini və bütövlüyünü təmin etmək üçün, ilk növbədə, beynəlxalq səviyyədə tanınmış banklardakı ABŞ-ın nəzarətində olan hesablara yatırılacaq.
"Bu vəsaitlər ABŞ hökumətinin qərarı ilə Amerika və Venesuela xalqlarının maraqlarına uyğun olaraq bölüşdürüləcək. Neft satışları dərhal başlayacaq və təxminən 30-50 milyon barel neftin satılması gözlənilir. Bu, qeyri-müəyyən müddətə davam edəcək", - deyə nazirlik bildirib.