Azərbaycan, Bakı, 16 oktyabr /Trend/
Qax rayonunda səyyar sərgi-seminar keçiriləcək.
Mədəniyyət və Turizm Nazirliyindən Trend-ə verilən məlumata görə, respublikamızın muzeylərində saxlanılan Azərbaycan xalqına məxsus maddi-mədəni irs nümunələrinin dağıdılmasının qarşısının alınması, onların konservasiyası üçün lazımi tədbirlərin görülməsi və mövcud istiqamətdə maarifləndirmə işlərinin aparılması məqsədilə nazirliyin təşkilatçılığı ilə 2012-ci ilin 16-19 oktyabr tarixində Qax rayonunda Muzey Sərvətləri və Xatirə Əşyalarının Elmi-Bərpa Mərkəzinin "Xilas olunmuş gözəllik" adlı səyyar sərgi-seminarı təşkil olunacaq.
Tədbir rayon muzeylərində çalışan rəssam-bərpaçıların peşə səriştələrinin artırılması ilə yanaşı, muzeylərdə saxlanılan əşyaların dağıdılmasının qarşısının alınması, habelə onların saxlanılma şəraitinin yaxşılaşdırılmasına xidmət edəcək.