Azərbaycan, Bakı, 19 noyabr /Trend, müxbir M.Əliyev/
ABŞ-ın "Real Vocal String Quartet" musiqi qrupu 18-24 noyabr tarixlərində Azərbaycanda səfərdədir. Bu barədə bazar ertəsi Trend-ə səfərin təşkilatçısı olan Birləşmiş Ştatların Azərbaycandakı səfirliyindən məlumat verilib.
Kaliforniya ştatının San Fransisko şəhərindən olan "Real Vocal String Quartet" musiqi qrupu klassik, simli kvarteti özünəməxsus Amerika formasında canlandıran və bu gün dünyada səsli və simli musiqi ifalarının birləşməsindən ibarət olan mahnıları ifa edən yeganə kvartetdir. Qrupun hər bir üzvü ifa zamanı oxuyur, mahnını mövzuya uyğunlaşdırır və improvizə edir. Qrupun repertuarı caz və rok, eləcə də Qərbi Afrika musiqisi və bluqras adlı folklor mahnılarını əhatə edir.
"Real Vocal String Quartet" qrupu Şimali Amerikada bir çox konsertlər verib, o cümlədən "Tonight Show" tok-şousunun aparıcısı Cey Leno və "Qremmi" mükafatçısı olan kanadalı musiqiçi Feist ilə birlikdə səhnəni paylaşıb.
Qrup dünyanın bir çox yerlərində musiqi vasitəsilə qarşılıqlı anlaşmanın daha da gücləndirilməsinə xidmət etmək məqsədilə aparıcı amerikalı musiqiçilərin çıxışlarını təşkil edən ABŞ Dövlət Departamentinin "Amerika musiqisi xaricdə" adlı proqramı çərçivəsində ilk dəfə Azərbaycanda çıxış edəcək. Azərbaycanda olduqları müddətdə qrup üzvləri Bakı şəhərində, Qusar və Xaçmaz rayonlarında səfərdə olacaq və burada seminarlar, cem-sessiyalar və ictimaiyyət qarşısında konsertlər verəcəklər.
Qrup üzvləri Azərbaycandan sonra Makedoniya, Bosniya, Latviya və Litvada da konsertlər verəcəklər.
"Real Vocal String Quartet" qrupunun bütün konsert proqramları pulsuzdur və geniş ictimaiyyət üçün açıqdır.