Bakı. Trend:
Xaçmaz Rayon İcra Hakimiyyəti və Quba-Xaçmaz Regional Təhsil İdarəsinin birgə təşkilatçılığı ilə “Konstitusiya və Suverenlik İli” çərçivəsində “Fest-Payız 2025” adlı festival keçirilib.
Bu barədə Trend-ə Xaçmaz Rayon İcra Hakimiyyətindən məlumat verilib.
Heydər Əliyev Mərkəzində keçirilən tədbirdə Xaçmaz Rayon İcra Hakimiyyətinin başçısı Elnur Rzayev, Yeni Azərbaycan Partiyası Xaçmaz rayon təşkilatının sədri Məhəmməd Balaqadaşov, Quba-Xaçmaz Regional Təhsil İdarəsinin müdiri Coşqun Əliyev və təhsil ictimaiyyətinin nümayəndələri iştirak ediblər.
Rayon rəsmiləri və təhsil işçiləri əvvəlcə mərkəzin foyesində Uşaq-Gənclər İnkişaf Mərkəzinin yetirmələrinin əl işlərindən ibarət rəsm əsərləri ilə tanış olublar.
“Fest-Payız 2025” adlı festivalda çıxış edənlər festivalın əhəmiyyətindən danışıblar. Qeyd edilib ki, festivalın keçirilməsində əsas məqsəd şagirdlər arasında məsuliyyətli vətəndaşlıq duyğusunu formalaşdırmaq, milli-mənəvi dəyərləri təbliğ etmək və erkən yaşlardan cəmiyyət üçün faydalı şəxsiyyətlər yetişdirməkdir.
Tədbir rəngarəng bədii proqramla davam edib. Mərkəzin şagirdləri tərəfindən hazırlanan çıxışlar, musiqi və rəqs ifaları bayram ab-havasını daha da canlandırıb.
Məktəblilərin bir-birindən maraqlı çıxışları tədbirə xüsusi rəng qataraq iştirakçılarda xoş ovqat yaradıb.
