Azərbaycan, Lənkəran, 02 iyun/ Trend , müxbir P.Əliyeva/ Azərbaycanın cənub bölgəsində, Masallı-Yardımlı yolunun birinci kilometrliyində iki nəfərin ölümü ilə nəticələnən ağır yol qəzası baş verib.
Trend -un arayışı: Azərbaycanda bu ilin birinci rübündə yol-nəqliyyat hadisələrində 176 şəxs həlak olub.
Trend -un bölgə müxbirinin məlumatına görə, iyunun 2-nə keçən gecə saat 00.15-də 28 yaşlı Coşqun Abdulhüseyn oğlu Hüseynovun idarə etdiyi "Mersedes- 190" markalı, 44 BL 218 dövlət nömrə nişanlı avtomobil ilə qarşı yoldan gələn Azad Murad oğlu Məmmədovun idarə etdiyi VAZ 2107 markalı, 10 FQ 988 dövlət nömrə nişanlı avtomobil toqquşub. Nəticədə VAZ 2107-nin sürücüsü Məmmədov hadisə yerində keçinib, onun sərnişini 52 yaşlı Masallı rayon sakini Ədalət Məmmədov isə xəstəxanada cərrahiyyə əməliyyatı olunsa da, həyatını xilas etmək mümkün olmayıb.
"Mersedes-190"-nın sürücüsü isə ağır bədən xəsarəti ilə Masallı rayon xəstəxanasına yerləşdirilib.
Masallı rayon Polis İdarəsinin müstəntiqi Ədalət Cəfərov bazar ertəsi Trend -a bildirib ki, qəzaya səbəb Məmmədovun yüksək sürətlə yolun qarşı tərəfinə çıxması olub. Faktla bağlı Cinayət Məcəlləsinin yol hərəkəti və nəqliyyat vasitələrinin istismarı qaydalarının ehtiyatsızlıqdan zərərçəkən şəxsin ölümünə səbəb olmaqla pozulması (263.2-ci) maddəsi ilə cinayət işi açılıb.
Masallı paytaxt Bakıdan 220 kilometr cənubda yerləşir.
Məqalə müəllifi ilə əlaqə ünvanı: [email protected]
