Azərbaycan, Xaçmaz, 07 iyun / Trend müxbir A.Qafarov/ Xaçmaz rayonunda dəmir yolunun düzgün keçilməməsi nəticəsində Qüdrət Xanlarov adlı şəxs iki ayağını itirib.
7 iyuna keçən gecə Xaçmaz rayonunun Qusarçay kənd sakini 42 yaşlı Qüdrət Xanlarov yerli stansiyada dayanacaqda duran Bakı-Rostov yük qatarının altından dəmir yolunu keçmək istəyib. Lakin bu zaman qatar yola düşüb və nəticədə Xanlarovun ayaqlarının üstündən keçib. Zərərçəkən dərhal mərkəzi rayon xəstəxanasına çatdırılıb. Burada o əməliyyat edilib. Əməliyyət zamanı Xanlarovun iki ayağı amputasiya olunub.
Xəstəxananın travmatologiya şöbəsinin müdiri Ağayar Quliyevin Trend -a verdiyi xəbərə görə, zərərçəkənin vəziyyəti ağır kimi dəyərləndirilir və hələlik onun həyatı təhlükə altındadır.
Xaçmaz rayon prokurorluğunun müstəntiqi Soltanməhəmməd İsmayılovun şənbə günü Trend -a bildirdiyinə görə, hadisəyə səbəb qayda ilə nəzərdə tutulmamış yerdə dəmir yolunun keçilməsi olub. Onun sözlərinə görə, ilkin məlumatlara əsasən zərərçəkən içkili halda idi.
Faktla əlaqədar istintaqa başlanılıb.