Azərbaycan, Şəki, 04 iyul/ Trend , müxbir E.Quliyev/ Azərbaycanın Şəki rayonundakı çaylarda daşqın olub.
Trend -un bölgə müxbirinin məlumatına görə, ötən gün gecə saatlarında güclü küləklə müşayət olunan yagış Kiş və Daşağıl çaylarında daşqınlara səbəb olub.
Daşqın 100 hektarlarla əkin sahələrinə ziyan vurub, güclü külək və yağış 5-ə yaxın yaşayış evinin dam örtüyünü uçurub.
Şəki rayon İcra Hakimiyyətindən verilən məlumata görə, şəhərin içməli suya olan tələbatının 80%-ni Kiş çayı ödədiyindən şəhərin su təsərrüfatı iflic vəziyyətə düşüb.
Şəki Su Kanaltörəmə Açıq Tipli Səhmdar Cəmiyyətinin sədri Bayram Məmmədov bildirib ki, gecə saatlarından başlayaraq Şəkiyə içməli suyun verilməsi dayandırılıb. Onun sözlərinə görə, dəyən ziyanın miqyası böyük olduğundan nəticələrin aradan qaldırılması və şəhərin su ilə təminatı sabah mümkün ola biləcək.
Şəki RİH-dən bildirilib ki, ən çox ziyan rayonun Oraban və Küngüt kəndlərinə dəyib.
Şəki respublikanın şimal-qərbində paytaxtdan 352 km məsafədə yerləşir.
Müəlliflə əlaqə saxlamaq üçün elektron ünvan - [email protected]
