Azərbaycan, Bakı, 15 fevral /Trend, müxbir K.Zərbalıyeva/
Azərbaycanda məhkum narkotik maddə satarkən polis tərəfindən yaxalanıb.
Daxili İşlər Nazirliyinin mətbuat xidmətindən Trend-ə verilən məlumata görə, fevralın 13-də Biləsuvar rayonu ərazisində Ədliyyə Nazirliyi Penitensiar Xidmətinin 4 saylı Məntəqə Tipli Cəzaçəkmə Müəssisəsində cəza çəkən Seymur Babayev 1 kiloqram həşişi satarkən ona yaxınlaşan polis əməkdaşına tərəf tapançadan atəş açıb.
Hadisə zamanı polis əməkdaşı xəsarət almayıb.
DİN-in Baş Narkotiklərlə Mübarizə İdarəsinin cənub bölgəsindəki regional şöbəsi və Cəlilabad rayon polis şöbəsinin əməkdaşlarının həyata keçirdikləri birgə əməliyyat-axtarış tədbirləri nəticəsində Babayev zərərsizləşdirilərək tutulub.
Ondan 1 ədəd nömrəsi silinmiş "Makarov" tapançası və 25 kiloqram 220 qram həşiş götürülüb.