Həlak olanın şəxsiyyəti və xəsarət alanların vəziyyəti barədə məlumat əlavə olunub (ilk xəbər saat 17:31-də yayılıb)
Azərbaycan, Bakı, 16 avqust /Trend, müxbir S.Ağayeva/
Bakı-Rostov marşrutu üzrə hərəkət edən ikimərtəbəli avtobusun Dağıstanın Süleyman-Stal rayonu ərazisində aşması nəticəsində həlak olan şəxsin şəxsiyyəti müəyyənləşdirilib. Həlak olan avtobus sürücüsü Azərbaycan vətəndaşı Rəhimov Etibar Razim oğludur (1976-cı il təvəllüdlü).
Avtobusun sərnişinləri yüngül bədən xəsarəti alıblar. Hadisə yerində onlara lazımi tibbi yardım göstərilib. Bu barədə Dağıstan FHN-dən bildirilib.
Azərbaycandan qəza yerinə sərnişinlərin Rostova aparılması üçün avtobus göndərilib.
"Moskva vaxtı ilə saat 14:50-də FHN-ə məlumat daxil olub ki, "Dağıstanın Süleyman-Stal rayonunun ərazisində "Qafqaz" federal şossesində Bakıdan Rostova gedən "Mersedes" markalı ikimərtəbəli avtobus aşıb", - bir qədər əvvəl Trend-ə Mahaçqala Fövqəladə Hallar Komissiyasından məlumat verilmişdi.
Məlumata görə, avtobusda cəmi 47 sərnişin olub, onlar arasında uşaq yoxdur.