Azərbaycan, Bakı, 29 iyun /Trend/
Dənizdə köməksiz vəziyyətdə qalmış balıqçılar xilas olunub.
Trend Fövqəladə Hallar Nazirliyinin rəsmi saytına istinadən məlumat verir ki, Xaçmaz rayonunda ("Seyidli" sularda xilasetmə postundan təxminən 5 km məsafədə nəzarət olunmayan ərazidə) 2 nəfər balıqçı qayığın mühərrikinin xarab olması səbəbindən dənizdə köməksiz vəziyyətdə qalıb. Dərhal FHN-in Dövlət Sularda Xilasetmə Xidmətinin dalğıc-xilasediciləri hadisə yerinə cəlb olunub, vətəndaşları xilas edib və qayığı sahilə çıxarıblar.
Bakı şəhəri, Xəzər rayonunda ("Buzovna" sularda xilasetmə məntəqəsindən təxminən 1500 metr məsafədə nəzarət olunmayan ərazidə) 1 nəfər rezin döşəyin üzərində olarkən küləyin aparması səbəbindən boğulmaq təhlükəsi ilə üzləşib və Fövqəladə Hallar Nazirliyinin dalğıc-xilasedicisi tərəfindən xilas olunub.
Həmçinin, Mingəçevir şəhəri, Mingəçevir su anbarında (sularda xilasetmə məntəqəsinin ərazisində) batmaq təhlükəsi ilə üzləşmiş 1 nəfər Fövqəladə Hallar Nazirliyinin dalğıc-xilasediciləri tərəfindən xilas olunub.