Bakı. Ceyhun Ələkbərov - Trend:
Samux rayonunda yanğın meşə ərazisində baş verməyib.
Bunu Trend-ə açıqlamasında Samux Rayon İcra Hakimiyyəti başçısının birinci müavini Tahir Qarayev bildirib. Onun sözlərinə görə, hadisə qeyri-yaşayış ərazisində qeydə alınıb:
“Yanğın gecə saatlarında Yenikənd kəndində yeni yaşayış massivinin aşağı tərəfində qeydə alınıb. Həmin ərazi qamışlarla örtülmüş gillik deyilən bir sahədir. İlkin ehtimallara görə, yanğına səbəb insan amilidir və xirda közərmədən baş verib”.
T. Qarayevin sözlərinə görə, hadisə yerinə cəlb olunan Fövqəladə Hallar Nazirliyinin əməkdaşları ərazinin bataqlıq olmasına baxmayaraq, yanğının qarşısını ala biliblər:
“Yay aylarında qrunt sular çəkiləndən sonra kənd camaatı həmin ərazidə mal-qara otarırlar. Qış aylarında isə torpaq gil olduğuna görə, yanğınsöndürən əməkdaşlar qamışlığa çətinliklə olsa giriblər və gecə saat 24 radələrində yanğın söndürülüb. Hadisə yaşayış ərazisindən uzaq olduğundan evlərə ziyan dəyməyib. Yanğın zamanı bir neçə ağac tələf olub. Hazırda yanğının səbəbi araşdırılır”.