Azərbaycan, Bakı, 19 fevral /Trend, müxbir Məftun Salmanov/
Antarktidada muzeydə işləmək üçün 4 nəfər axtarılır. Trend-in Türkiyənin "Milliyyət" qəzetinə istinadən verdiyi məlumata əsasən, işçinin bütün xərcləri işəgötürən tərəfindən qarşılanacaq.
Təklifi qəbul edənlər ayda 1000 funt-sterlinq qazanacaqlar. Burada işləməyin mənfi cəhəti havanın həddən artıq soyuq olmasıdır. Həmin şəxslər buradakı poçt, dükan və muzeyi işlədəcəklər.
İş blankında namizədlərə aşağıdakı suallar verilir: Qarın üzərində ağır yük daşıyarkən pinqvinlərdən qaça bilərsinizmi? Bir ay yuyunmasanız, ətrafınızda 2 min pinqvin olsa, sizin üçün problem olmaz ki?
Seçilən namizədlər İngiltərədə 5 günlük təlim proqramından sonra Antarktidaya yola salınacaqlar.