Azərbaycan, Bakı, 05 iyun / Trend , müxbir E.Tariverdiyeva /
Dağlıq Qarabağ münaqişəsinin nizamlanması perspektivləri bu gün Rusiyanın xarici işlər nazirinin müavini Qriqor Karasin ilə ATƏT-in Minsk qrupunun həmsədrləri tərəfindən müzakirə olunub. Bu barədə Trend -a Amerikalı həmsədr Metyu Brayza bildirib.
"Biz konsultasiyalar keçirmişik və Dağlıq Qarabağ münaqişəsinin nizamlanması məsələsinə yanaşma formamızı koordinasiya etmişik", - deyə Moskvadan telefonla Brayza bildirib.
Onun sözlərinə əsasən, həmsədrlər Dağlıq Qarabağ münaqişəsinin nizamlanması üzrə işləri davam etdirəcək.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının 20 faizi, yəni Dağlıq Qarabağ ərazisi və bu əraziyə bitişik 7 rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri, ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
Məqalə müəllifi ilə əlaqə ünvanı: [email protected]