ABŞ, Vaşinqton, 05 noyabr / Trend , müxbir N.Boqdanova /
Azərbaycan Ermənistana BMT-də cavab verməyə hazırlaşır, bu barədə Trend -a Vaşinqtonda Azərbaycan xarici işlər nazirinin müavini Araz Əzimov bildirib.
"Ermənistan tərəfi həqiqətə uyğun olmayan informasiya təqdim etməklə beynəlxalq cəmiyyəti aldadır", - Əzimov qeyd edib.
"Hazırda diplomatlarımız Ermənistana cavab olacaq məruzə üzərində çalışırlar. Məruzə yaxın zamanda təqdim olunacaq", - o bildirib.
Diplomatın sözlərinə əsasən, Ermənistan tərəfi danışıqları kəsmək üçün yalan məlumatlar verməkdən istifadə edir.
Vaşinqtona səfəri zamanı Azərbaycan xarici işlər nazirinin müavini rəsmi görüşlərlə yanaşı, aparıcı tədqiqat insitutlarının və qeyri-kommersiya təşkilatlarının nümayəndələri ilə də Qarabağ sülh prosesinin müzakirəsi üçün iclas keçirəcək.
Danışıqlar prosesinə toxunan Əzimov qeyd edib ki, Azərbaycan Dağlıq Qarabağ münaqişəsinin nizamlanmasında yalnız özünün prinsipial mövqeyi çərçivəsində kompromisə getməyə hazırdır.
"Vəziyyət çox mürəkkəbdir. Münaqişənin tam birtərəfli həlli mövcud deyil. Yalnız kompromis həll mövcuddur və Azərbaycan artıq getməyə hazır olduğu kompromislərin siyahısını verib. Öz prinsipial mövqeyində duraraq Azərbaycan kompromis həllə hazırdır", - o əlavə edib.
Nazir müavininin sözlərinə əsasən, rəsmi Bakı Dağlıq Qarabağ regionuna yüksək özünüidarəetmə statusu verməyə hazırdır və münaqişənin ATƏT-in Minsk Qrupunun həmsədrləri tərəfindən baza prinsipləri kimi qəbul edilən üç prinsipi əsasında nizamlanmasının tərəfdarıdır.
