Azərbaycan, Bakı, 6 aprel /Trend, müxbir M.Əliyev/
Ermənistan tərəfi sabah azərbaycanlı hərbi əsirRafiq Həsənovu qaytaracaq. Bu barədə Ermənistan KİV-ləri məlumat verir.
Ermənistan Müdafiə Nazirliyindən Mediamaks-a bildirilib ki, təhvilvermə sabah saat 12:00-da Naxçıvan Muxtar Respublikasının Sədərək rayonunda baş tutacaq.
Rafiq Həsənov 8 oktyabr 2008-ci ildə qoşunların təmas xəttində, Qazax rayonunun Kəmərli kəndində əsir götürülüb.
Azərbaycanın əsir və itkin düşmüş, girov götürülmüş vətəndaşlarla əlaqədar Dövlət Komissiyasından Trend-ə bildirildiyi kimi, Ermənistan tərəfi Ermənistanda saxlanılan iki hərbi əsirdən birini qaytaracaq.
Rafiq Həsənovdan əlavə, 2009-cu il mayın 10-da cəbhənin Füzuli istiqamətində əsir götürülmüş əsgər Anar Hacıyev və 2009-cu ilin dekabrında Azərbaycanın Tovuz rayonunda girov götürülmüş Eldar Tağıyev Ermənistan tərəfində saxlanılır.
Ermənistan silahlı qüvvələri tərəfindən qətlə yetirilmiş azərbaycanlı vətəndaşların meyitləri şənbə günü, aprelin 3-cü saat 12:00-da Naxçıvan Muxtar Respublikasının Sədərək rayonunda Azərbaycan tərəfinə təhvil verilib.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan silahlı qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurasının Dağlıq Qarabağın və işğal olunmuş ərazilərin azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.