Azərbaycan, Bakı, 4 dekabr /Trend, müxbir M.Əliyev/
Azərbaycan tərəfi atəşkəs rejimini pozmayıb və Ermənistanla əvvəllər əldə etdiyi razılaşmaya sadiq qalır. Bu barədə şənbə günü Trend-ə Azərbaycan Müdafiə Nazirliyinin mətbuat xidmətinin rəis müavini Teymur Abdullayev deyib.
Şənbə günü Ermənistan-Azərbaycan sərhədində snayper silahından istifadə ilə növbəti insident baş verib. Azərbaycan tərəfinin açdığı atəş nəticəsində müddətdən artıq xidmət edən əsgər Samvel Nikolyan güllə yarası alıb, Ermənistan KİV-i məlumat verir.
Atəşkəs rejiminə dair sazişin əldə edildiyi 1994-cü ildən bu günə qədər atəşkəs rejimi mütəmadi olaraq Ermənistan tərəfindən pozulur.
"Əgər Ermənistan ordusunda hansısa silahlı insidentlər baş verirsə, bu onların daxili problemləridir", - Abdullayev qeyd edib.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır.
1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır. BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.