Azərbaycan, Bərdə, 3 iyun /Trend, müxbir Ş.Cəliloğlu/
Ermənistan Silahlı Qüvvələrinin atəşkəsi pozması nəticəsində cümə günü Azərbaycanın bir mülki vətəndaşı həlak olub.
Trend-in bölgə müxbirinin məlumatına görə, Ağdam rayonunun Çəmənlı kəndi yaxınlığında, qoşunların təmas xəttində mal-qara otaran Ağcabədi rayon sakini Elmar Piriyev erməni silahlıları tərəfindən öldürülüb.
Baş verən hadisə ilə bağlı hələ ki rəsmi məlumat verilmir.
Bundan əvvəl martın 8-də Ermənistan Silahlı Qüvvələrinin Ağdamın işğal altında olan Şıxlar kəndi istiqamətində atəşkəsi pozması nəticəsində Azərbaycanın bir mülki vətəndaşı - Orta Qərvənd kəndinin 9 yaşlı sakini Fariz Arif oğlu Bədəlov həyətdə oynayarkən aldığı güllə yarasından ölüb.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.